Сура 53: эн-НЕДЖМ

Меккеде энген, 62 аеттир. Ялынъыз 32-нджи аети Мединеде назиль олгъан.

Бисмиляаhирраhмаанирраhиим (Рахман ве рахим олгъан Аллаhнынъ адынен).
1-3 Баткъан вакътында йылдызгъа ант олсун ки, аркъадашынъыз (Муhаммед) сапмады ве батылгъа инанмады; о арзусына коре де лаф этмез.
4 О (бильдиргенлери) вахий этильгенден башкъа шей дегиль.
5-7 Чюнки, оны кучьлю-къуветли ве усьтюн яратылышлы бири (Джебраил) огретти. Сонъра энъ юксек уфукъта олгъанда, асыл шеклинен догърулды.
8-9 Сонъра (Муhаммедге) якъынлашты, деркен, даа да якъынлашты. О къадар ки (бирлештирильген) эки яй арасы къадар, атта даа да якъын олды.
10-11 Бунынъ узерине, Аллаh къулына вахийини бильдирди. (Козьлеринен) корьгенини къальби яланламады.
12 Онынъ корьгенлери акъкъында шимди онынънен тартышаджакъсынъызмы?
13-14 Ант олсун, оны Сидрету'ль-Мунтехаанынъ янында эвельде бир кере даа корьген эди.
15 Дженнету'ль-Ме'ваа да онынъ янындадыр.
16 Сидрени къаплагъан къапламыш эди.
17 Козю къыйыгъындан бакъмады ве сынъырны ашмады.
18 Ант олсун, о Раббининъ энъ буюк аетлеринден бир къысмыны корьди.

(Суре йылдызгъа еминнен башлангъан. Бу «йылдыз» – йылдыз джынсы, Суреййа йылдызы, Къур'ан аетлери ве Аз. Пейгъамбер шеклинде анълатылгъан. Йылдызнынъ батувы ве догъувы къыямет кунюнен тефсир этильген. Къур'ан озюне вахий этильген Аз. Пейгъамбер, догъру ёлдан сапмагъан ве батылгъа инанмагъан. Онъа энген Къур'ан вахийге эсасланмакътадыр. Вахий кетирген Джебраил (а.с.)дыр. Иште, бу мелек бир къач кере аслый суретинде Аз. Пейгъамберге корюнген. Араларындаки месафенинъ, аетте де бильдирильгени киби, пек якъын бир вакъытта, Джебраил вахий этильгенлерни Пейгъамберимизге бильдирген. Аз. Пейгъамбернинъ Джебраилнен корюшюви Сидрету'ль-Мунтехаада олгъан эди. Базылары да, Пейгъамберимизнинъ бу ерде корьгени Дженаб-ы Хакъ олгъаныны да илери сюрелер. Сидрету'ль-Мунтехаа – сонъки терек, яни яратылгъан алемнинъ сонъки нокътасы демектир. Бундан башкъасы Аллаhнынъ гъайб алемидир. Дженнету'ль- Ме'ваа да – мелеклер, шеитлер ве муттакъийлернинъ рухлары олгъан ердир. Сидредекилерни тариф ве тавсиф этмек мумкюн дегиль. Сидрени къаплагъаннынъ – мелеклер я да Аллаhнынъ нуры олгъаны ривает этиле).

19 Корьдинъизми о Лаат ве Уззааны?
20 Ве учюнджилери олгъан о бирини, Менаатны.
21 Демек, эркек сизге, ыргъачы Онъа, ойлеми?
22 О вакъытта бу, инсафсызджа бир такъсиматтыр!
23 Булар (путлар), сизлер ве аталарынъыз такъкъан исимлерден башкъа бир шей дегиль. Аллаh олар акъкъында ич бир делиль эндирмеген. Олар, анджакъ зангъа ве нефислерининъ арзусына уймакъталар. Албуки, оларгъа Рабблери тарафындан ёл косьтериджи кельгендир.
24 Ёкъса, инсан эр арзу эткен шейине саип оладжакъмы?
25 Ахирет де, дюнья да, Аллаhнынъдыр.
26 Коклерде нидже мелек бар ки, оларнынъ шефаатлары, тилеген ве хошнут олгъан кимсе ичюн, Аллаhнынъ изин берювинден гъайры, бир ишке ярамаз.
27 Ахиретке инанмагъанлар мелеклерге ыргъачыларнынъ адларыны такъмакъталар.
28 Албуки, оларнынъ бу хусуста ич бильгилери ёкътыр. Садедже зангъа уймакъталар. Зан исе, ич шубесиз, акъикъат нокътаи назарындан, ич бир шей ифаде этмез.
29 Шунынъ ичюн, сен бизни анъувдан юзь чевирген ве дюнья аятындан башкъа бир шей истемеген кимселерге юзь берме.
30 Иште, оларнынъ ирише биледжек бильгилери будыр. Шубесиз ки, сенинъ Раббинъ, эбет О, ёлундан сапкъанны даа яхшы билир; О, хидаетте олгъанны да чокъ яхшы билир.
31 Коклерде ве ерде олгъанлар эп Аллаhнынъдыр. Бу, Аллаhнынъ яманлыкъ эткенлерни япкъанларынен джезаландырувы, гузель арекет эткенлерни де даа гузелинен мукяфатландырувы ичюндир.
32 Уфакъ-тюфек къусурлары истисна, буюк гунахлардан ве эдепсизликлерден къачынгъанларгъа кельгенде, биль ки, Раббинънинъ авфы болдыр. О, сизни даа топракътан яраткъан вакътында ве сиз аналарынъызнынъ къарынларында булунгъан сыранъызда (биле), сизни энъ яхшы билиджидир. Шунынъ ичюн озюнъизни темизге чыкъарманъ. Чюнки, О, яманлыкътан сакъынгъанны даа яхшы билир.

(Аз. Адемнинъ топракътан яратылгъаны, инсаннынъ ана къарнындаки вазиети, аслындаки зайыфлыгъы ве аджизлиги хатырлатыларакъ, озюни бегенип, гъурургъа къапылмамасы истенильгендир).

33 Корьдинъми артына къайткъанны?
34 Азачыкъ берип, сонъунда бермемекте тирельгенни?
35 Аджеба, гъайбнынъ бильгиси озь янында да, корьмектеми?

(33-35-нджи аетлернинъ мусульман олгъандан сонъ, мушрикликке дёнген Велиид б. Мугъиире акъкъында энгени ривает этиле).

36-37 Ёкъса, Мусанынъ ве ахтына вефа косьтерген Ибрахимнинъ саифелеринде язылгъанлар онъа хабер берильмедими?
38 Акъикъатен, ич бир гунахкяр башкъасынынъ гунах юкюни юкленалмаз.
39 Бильсин ки, инсан ичюн озь чалышмасындан башкъа бир шей ёкътыр.
40 Ве чалышувы да, илериде корюледжек.
41 Сонъунда онъа къаршылыгъы тас-тамам бериледжек.
42 Ве, шубесиз, энъ сонъки барув Раббинъедир.

(Аетлерде инсаннынъ эсасен башкъасынынъ япкъанындан бир файда корьмейджеги, чюнки эр кеснинъ озю ичюн чалышкъаны, чалышувнынъ нетиджелери къыяметте корюледжеги хатырлатыла).

43 Догърусы, кульдирген де, агълаткъан да, Одыр.
44 Ольдюрген де, тирильткен де Одыр.
45-46 Шу ери муакъкъакъ ки, (рахимге) къоюлгъанда нутфеден, эркек ве ыргъачыдан ибарет олгъан эки чифтни О яратты.
47 Шубесиз, текрар тирильтмек де Онъа аиттир.
48 Зенгин эткен де, ёкъсул япкъан да, Одыр.

(Аетнинъ экинджи къысымына «итиядждан къуртаргъан» манасы да берильген).

49 Догърусы, Ши'раа йылдызынынъ Рабби де, Одыр.

(Ши'раа – Хузаа къабилеси табынгъан парлакъ бир йылдыздыр).

50 Ве, шубесиз ки, эвельки Аад къавмыны О эляк этти.
51 Семуудны да (О эляк этти) ве артта ич бир шей къалдырмады.
52 Даа эвельде чокъ залым ве зияде адден ашкъан Нуh къавмыны (эляк эткен эди).
53 Алт-усьт олгъан шеэрлерни де, О бойле япты.
54 Оларнынъ башына кетиреджегини кетирди!
55 Шимди Раббинънинъ ниметлерининъ ангисинде шубеге тюшерсинъ.
56 Иште, бу, ильк тенбиеджилерден бир тенбиеджидир.

(Юкъарыдаки аетлерде зикр этильген Аад, Семууд, Нуh ве Луут къавмлары инкярлары ве исьянларынынъ джезасыны эляк этилерек чеккенлердир. Булар ичинде Аз. Нуhнынъ къавмы, Аад ве Семууддан даа залым ве ёлдан азгъан бир топлулыкъ эди. Чюнки, Аз. Нуh араларында узун йыллар къалгъаны алда, онъа инанмагъанлар ве олгъаны къадар эзиет япкъан эдилер. Аз. Луут къавмынынъ эляк этилюви, бу къавмнынъ къасабалары кокке савурылгъандан сонъ, ташланаракъ, ернен бир этилювнен керчеклешкен эди).

57 Якълашкъан якълашты.
58 Оны (вакъытны) Аллаhтан башкъа ашкяр этеджек ёкъ.
59 Шимди сиз бу сёзге (Къур'ангъа) шашмакътасынъызмы?
60 Кульмектесинъиз де, агъламайсынъыз!
61 Ве сиз гъафлет ичинде эгленмектесинъиз.
62 Айды, Аллаhкъа седжде этип, Онъа къуллыкъ этинъ!