Сура 65: эт-ТАЛААКЪ

«Талаакъ» –айырмакъ манасындадыр. Суре айырмакъ мевзусындан баас эткени ичюн, бу исимни алгъан. Мединеде энген, 12 аеттир.

Бисмиляаhирраhмаанирраhиим (Рахман ве рахим олгъан Аллаhнынъ адынен).
1 Эй, Пейгъамбер! Къадынларны айыраджагъынъызда, оларны иддетлерини козетерек айырынъ ве иддетни де сайынъ. Раббинъиз Аллаhтан къоркъунъ. Ап-ачыкъ бир аясызлыкъ япувлары алы бир тарафтан, оларны эвлеринден чыкъарманъ, озьлери де чыкъмасынлар. Булар Аллаhнынъ сынъырларыдыр. Ким Аллаhнынъ сынъырларыны кечсе, шубесиз, озюне зулум эткен олур. Билалмазсынъ, бельки, Аллаh бундан сонъ бир алны ортагъа чыкъара къояр.

(Аетте, Аз.Пейгъамберге хитап этильсе де, укюм умумийдир, бутюн умметке аиттир. Аетке коре, айырылмасы истенген къадынлар, иддетлери дикъкъаткъа алынаракъ, адеттен темизленгенлеринден сонъ айырылыр. Айырылгъан къадыннынъ да, иддетине риает этилир, яни учь хайз я да темизленюв муддети тамамланмадан, -ридж'ый талакъта- къоджа къадынына къайта билир. Бу муддет толгъандан сонъ, айырылмакъ кесен-кеслешир. Айырылгъан къадынларгъа зарар бермемек аетте беян этильген узюр ортагъа чыкъмагъандже, иддетлери биткенге къадар, эвде къалувлары теминленир. Аетте бу муддет ичюн де янъы бир вазиет ортагъа чыкъа биледжеги хатырлатылмакъта ки, бу нефретнинъ севгиге дёнюви, пешманлыкънынъ юзь берюви ве чифтлер арасында узлашувнынъ мейдангъа келювидир. Аслында бир хадисте бильдирильгенине коре, айырмакъ, элял олмакънен берабер, Аллаh бегенмеген бир элялдыр).

2-3 Иддет муддетлерини толдыргъанларында, оларны я диний ольчюлер ичерисинде (никяхынъыз алтында) тутынъ, я да олардан диний ольчюлерге коре айырылынъ. Аранъыздан адалет саиби эки адамны да шаат тутынъ. Шаатлыкъны Аллаh ичюн япынъ. Иште, бу Аллаhкъа ве ахирет кунюне инангъанларгъа берильген огюттир. Ким Аллаhтан къоркъса, Аллаh онъа бир чыкъыш ёлу ихсан этер ве онъа беклемеген еринден рызыкъ берир. Ким Аллаhкъа ишанса, О, онъа етер. Шубесиз, Аллаh эмрини ерине кетириджидир. Аллаh эр шей ичюн бир олчю къойгъандыр.

(Ает беклев муддетининъ сонъуна якълашкъан къадыннен багълы оларакъ, къоджасы япаджакъ ишлерини сыралай. Булар, я текрар алмакъ, я да джезаландырып, зараргъа сокъмадан айырмакътыр. Эр эки вазиетте де, эки шаат олмасы шарт. Юкъарадаки аетлерде кечкен талаакънен багълы эмирлер бойле беян этиле билир: Айырувны суннетке уйгъун шекильде япмакъ, иддетни саймакъ, къадынны эвинден чыкъармамакъ, айырув сырасында шаат тутмакъ, шаатлыкъны хакъ ольчюлери ичинде япмакъ).

4 Къадынларынъыз арасындан адеттен кесильмиш олгъанларнен, адет корьмегенлер хусусында шубе этсенъиз, оларнынъ беклемек муддетлери учь айдыр. Юклю олгъанларнынъ беклемек муддети исе, юклерини быракъувлары (догъурувлары)дыр. Ким Аллаhтан къоркъса, Аллаh онъа ишинде бир къолайлыкъ берир.
5 Иште, бу Аллаhнынъ сизге эндирген эмридир. Ким Аллаhтан къоркъса, Аллаh онынъ яманлыкъларыны къапатыр ве онынъ мукяфатыны арттырыр.
6 Оларны кучюнъиз ольчюсинде отургъан еринъизнинъ бир болюминде отуртынъ, оларны сыкъыштырып (кетювлерини теминлемек ичюн), оларгъа зарар бермеге къалкъышманъ. Эгер юклю иселер, догъургъанларына къадар нефакъаларыны беринъ. Сиз ичюн баланы эмизселер, оларгъа акъларыны беринъ, аранъызда уйгъун бир шекильде анълашынъ. Эгер анълашалмасанъыз, баланы башкъа бир къадын эмизеджек.
7 Имкяны кениш олгъан, нефакъаны имкянларына коре берсин; рызкъы тарлашкъан да, Аллаhнынъ онъа бергени къадарындан нефакъа одесин. Аллаh ич кимсени берген имкянындан зиядесинен месулиетли тутмаз. Аллаh бир кучлюктен сонъ, бир къолайликъ яратаджакътыр.
8 Раббининъ ве Онынъ эльчилерининъ эмиринден узакълашып, ёлдан азгъан нидже мемлекетлер бар ки, биз оларны (эалисини) четин бир эсапкъа чеккен ве оларны корюльмеген азапкъа огъраткъандырмыз.
9 Бойледже, олар да япкъанларынынъ къаршылыгъыны таткъанлар ве ишлерининъ сонъу там бир зиян олгъандыр.
10 Аллаh оларгъа шиддетли бир азап азырлагъан. Эй, инангъан акъыл саиплери! Аллаhтан къоркъунъ. Аллаh сизге, акъикъатен бир тенбиеджи (китап) эндирген.
11 Иман этип, салих амель ишлегенлерни, къаранлыкълардан айдынлыкъкъа чыкъармакъ ичюн, сизге Аллаhнынъ ап-ачыкъ аетлерини окъугъан бир Пейгъамбер ёллагъан. Ким Аллаhкъа инанса ве файдалы иш япса, Аллаh оны алтларындан ирмакълар акъкъан, ичинде эбедий къаладжакъ дженнетлерге къояр. Аллаh о кимсе ичюн, акъикъатен гузель бир рызыкъ берген.
12 Аллаh еди къат кокни ве ерден де о къадарыны яраткъандыр. Ферман булар арасындан энип турмакътадыр ки, бойледже, Аллаhнынъ эр шейге къадир олгъаныны ве эр шейни ильминен къушаткъаныны билесинъиз.