Сура 63: эль-МУНААФИКЪУУН

Мединеде энген, 11 аеттир. Мунафыкларнынъ давранышларындан сёз юрсетильгени ичюн, бу адны алгъан.

Бисмиляаhирраhмаанирраhиим (Рахман ве рахим олгъан Аллаhнынъ адынен).
1 Мунафыклар санъа кельгенлеринде: Шаатлыкъ этермиз ки, сен Аллаhнынъ Пейгъамберисинъ, дерлер. Аллаh да билир ки, сен эльбетте, Онынъ Пейгъамберисинъ. Аллаh мунафыкларнынъ кесен-кес яланджы олгъанларыны бильмекте.
2 Еминлерини къалкъан этип, Аллаh ёлундан саптылар. Акъикъатен, оларнынъ япкъанлары не фенадыр!
3 Бунынъ себеби, оларнынъ башта иман этип, сонъра инкяр этювлеридир. Бу себептен, къальплери муурьленгендир. Артыкъ олар ич анъламазлар.
4 Оларны корьген вакътынъда, къыяфетлери ошунъа кетер, лаф этселер, сёзлерини динълерсинъ. Олар санки диваргъа таянгъан кутюклер кибидир. Эр гурюльтини озь алейхилерине санарлар. Душман олардыр, олардан сакъын. Аллаh оларнынъ джанларыны алсын. Насыл бу алгъа кельмектелер?

(Тасдикъ эткенлерини тиллеринен сёйлегенлери алда, къальплеринен инкяр эткен, бойледже, сёйлегенлери, инанчларынынъ акси олгъан мунафыкъларнынъ джуссели, ири ве якъышыкълы инсанлар олгъаны ифаделенмекнен, мунафыкларнынъ ребери Абдуллах б. Убей, Мугъиз б. Къайс ве Джедб б. Къайскъа ишарет этильген. Акъикъатен, булар косьтеришли вуджутларынен Аз.Пейгъамбернинъ меджлисине келир, диваргъа таяныр, бедиий ве тесирли къонушмалар япар эдилер. Булар бу арекет ве давранышларнен урба кийдирильген кутюклерге я да диваргъа таяндырылгъан керестелерге бенъзетильгенлер. Къалыплары бар, факъат къальп ве идраклери ёкътыр, эки юзлюликлери себебинден, чокъ къоркъакътырлар. Бунъа рагъмен, олар энъ телюкели душман билинмелидирлер).

5 Оларгъа: Келинъ, Аллаh Пейгъамбери сиз ичюн магъфирет тилесин, денильген вакъытта, башларыны чеврирлер ве сен оларнынъ буюклик таслараякъ, узакълашкъанларыны корерсинъ.
6 Оларгъа магъфирет тилесенъ де, тилемесенъ де, бирдир. Аллаh оларны кесен-кес багъышламайджакъ. Чюнки, Аллаh ёлдан чыкъкъан топлулыкъны догъру ёлгъа къавуштырмаз.

(Аз.Пейгъамбер, Бени Мусталикъ сеферинде олгъанда, Мурейси сувы башында Джехджах б. Саид (р.а.)нен Синан-ы Джухений арасында къавгъа чыкъкъан, факъыр мухаджирлерден бири Джехджах лехине къавгъагъа киришкен. Мунафыкларнынъ буюги Абдулах б. Убей де мухаджирлерге агъыр акъаретлер савураракъ, ярдым этильмемесини сёйлеген. Даа пек генч яшта олгъан Зейд б. Эркъам (р.а.) бу ашшалайыджы сёзлерни эшиткен эди. Вазиетни Аз.Пейгъамберге хабер берген. Аз.Пейгъамбер де, Ибн Убейни чагъыртаракъ, сёйлегенлерини сораштыргъан. Ибн Убей мухаджирлернен багълы къабаатлавларыны инкяр эткенинен, Аз.Пейгъамбер ве сахабе янында яланджы вазиетине тюшкенинден, сонъ дередже кедерленген Зейднинъ догърулыгъы бу суренинъ энювинен ортагъа чыкъкъан. Ибн Убей исе, аетте бильдирильгени киби, озюне теклиф олунгъан истигъфар талапларыны ред эткен. Аз.Пейгъамбернинъ узурына барувны шанына сыгъдырмагъан. Арадан чокъ вакъыт кечмеден, агъыр бир хасталыкънен ольген).

7 Олар: Аллаhнынъ эльчиси янында булунгъанлар ичюн ич бир шей арджламанъ ки, дагъылып кетсинлер, дегенлер эди. Албуки, коклернинъ ве ернинъ хазинелери Аллаhнынъдыр. Факъат мунафыкълар буны анъламазлар.
8 Олар: Ант олсун, эгер Мединеге къайтсакъ, усьтюн олгъан зайыф олгъанны о ерден мытлакъа чыкъараджакъ, дей эдилер. Албуки, асыл усьтюнлик анджакъ Аллаhнынъ, Пейгъамберининъ ве му'минлернинъдир. Факъат мунафыкълар буны бильмезлер.

(Мунафыкълар озьлерини кучлю, шерефли, мусульманларны зайыф, ашша корьмектелер, Бени Мусталыкътан къайткъанда, оларны Медениден чыкъараджакъларыны сёйлей эдилер).

9 Эй, иман эткенлер! Малларынъыз ве балаларынъыз сизни Аллаhны анъмакътан узакълаштырмасын. Ким буны япса, иште олар зиянгъа огърагъанлардыр.
10 Эр анги биринъизге олюм келип де: Раббим! Мени якъын бир муддеткедже кечиктирсенъ де, садакъа берип, яхшылардан олсам! деювинъден эвель, сизге берген рызкъымыздан арджланъ.
11 Аллаh, эджели кельгенде, ич кимсени (олюмини) кечиктирмез. Аллаh япкъанларынъыздан хабердардыр.