Сура 66: эт-ТАhРИИМ

Адыны Аз.Пейгъамбернинъ базы ашаладжакъларны озюне ясакълагъаныны анълаткъан биринджи аеттен алгъан. Мединеде назиль олгъан, 12 аеттир.

Бисмиляаhирраhмаанирраhиим (Рахман ве рахим олгъан Аллаhнынъ адынен).
1 Эй, Пейгъамбер! Зевджелеринънинъ ризасыны козетерек, Аллаhнынъ санъа элял эткен шейини ничюн озюнъе арам этмектесинъ? Аллаh чокъ багъышлайыджы, чокъ мерхаметлидир.

(Ает ишарет эткен адисе шу: Аз.Пейгъамбер зевджелеринден Зейнеб бинти Джахшнынъ эвинде бал шербети ичкен ве бу себепнен, онынъ янында бираз зияде къалгъан. Бу алны куньлеген эки зевджеси Айше ве Хавса араларында къарарлаштырып, Пейгъамбер янларына баргъанда, ондан мегъафир къокъусы кельгенини сёйледилер. Аз.Пейгъамбер мегъафир ашамагъаныны айтты. «Демек ки, балны япкъан къурт мегъафир ялагъан», деди ве бир даа бал шербети ичмемеге емин этти. Суренинъ бу мунасебетнен энгени ривает этильген).

2 Аллаh, (кереккенде) еминлеринъизни бозувынъызны сизге уйгъун япкъан. Сизинъ ярдымджынъыз Аллаhтыр. О, билиджидир, икмет саибидир.
3 Пейгъамбер зевджелеринден бирине гизлиден бир сёз сёйлеген эди. Факъат къадыны, о сёзни башкъаларына хабер берип, Аллаh да буны Пейгъамберге беян эткенинен, Пейгъамбер бир къысмыны бильдирген, бир къысмынданда вазгечкен эди. Пейгъамбер буны онъа хабер бергенинен къадыны: Буны санъа ким бильдирди? деди. Пейгъамбер: Билиджи, эр шейден хабери олгъан Аллаh манъа хабер берди, деди.

(Риваетке коре, Ресулуллах къадыны Хавса эвде олмагъан бир вакъытта, джариеси Марийени онынъ одасына алгъан эди. Хавса бундан хабердар олгъанынен, кедерини бильдирген ве дарылгъан эди. Ресулуллах да Хавсагъа бундан бу яна Марийени тёшегине алмайджагъыны айткъан ве буны гизли тутувыны тенбилиеген эди. Хавса исе, бу меселени Аз.Айшеге анълаткъан, бунынъ узерине юкъарадаки ает назиль олгъан.
Башкъа бир риваетке коре, Аз.Пейгъамбер олюминден сонъ, халифеликке сырасынен Эбу Бекир ве Умернинъ кечеджеклерини сёйлеген, Хавса Аз.Пейгъамбернинъ бу сырыны Аз.Айшеге сёйлегенинен, вазиет вахий иле Аз.Пейгъамберге бильдирильген ве аетте зикр этильген къонушма садир олгъан).

4 Эгер экинъиз де Аллаhкъа тёвбе этсенъиз, (еринде олур). Чюнки, къальплеринъиз сапкъан эди ве эгер Пейгъамберге къаршы бир-биринъизге аркъа олсанъыз, билесинъиз ки, онынъ досту ве ярдымджысы Аллаh, Джебраил ве му'минлернинъ эйилеридир. Буларнынъ артындан мелеклер де (онъа) ярдымджыдыр.

(Аетте, Аз.Айше ве Хавсагъа хитап этильген, Аз.Пейгъамбернинъ гонълюни алувлары истенильген, куньджюлик, сыр даркъатмакъ ве о хошланмайджакъ адден ашувлардан къачынмакъ меселесинде тенбиеленгенлер).

5 Эгер о сизни айырса, Рабби онъа сизден даа яхшы, озюни Аллаhкъа багъышлагъан, инангъан, себатнен итаат эткен, тёвбе эткен, ибадет эткен, ораза туткъан, тул ве бакире къадынлар бере билир.

(Ает Аз.Пейгъамбернинъ ич бир зевджесини айырмагъанынынъ делилидир).

6 Эй, инангъанлар! Озюнъизни ве аиленъизни, якъарлыгъы инсанлар ве ташлар олгъан атештен къорчаланъ. Онынъ башында аджымагъан, кучлю, Аллаhнынъ оларгъа буюрулгъанына къаршы кельмеген ве эмир этильгенлерини япкъан мелеклер бардыр.
7 Эй, кяфирлер! Бугунь узюр тилеменъ! Сиз, анджакъ ишлегенлеринъизнинъ джезасыны чекеджексинъиз, (денилир).
8 Эй, иман эткенлер! Самимий бир тёвбе иле Аллаhкъа дёнюнъ. Умют этилир ки, Раббинъиз сизинъ яманлыкъларынъызны къапатыр. Пейгъамберни ве онынънен бирликте иман эткелерни утандырмайджакъ куньде Аллаh сизни, ичлеринден ирмакълар акъкъан дженнетлерге къояр. Оларнынъ оглеринден ве сагъларындан (амелерининъ) нурлары айдынлатып кетер де, «Эй, Раббимиз! Нурымызны биз ичюн тамамла, бизни багъышла; чюнки, Сен эр шейге къадирсинъ», дерлер.

(«Самимий бир тёвбе» дие терджиме этильген «тёвбе-и насууh» ичюн бир чокъ ёрум япылгъан. Буларнынъ умумий нокътасы шу: «Насууh», «нусh» эсасындандыр. Бунъа коре, «тёвбе-и насууh»; тёвбе эткеннинъ озь нефсине насиат динълете билюви, гунахларына сонъ дередже кедерленюви ве артыкъ оларгъа дёнмемеге къарар берюви демектир).

9 Эй, Пейгъамбер! Кяфирлерге ве мунафыкъларгъа къаршы джихад эт, оларгъа нисбетен серт давран, оларнынъ бараджакъ ерлери джеэннемдир. О барыладжакъ ер не де фенадыр!
10 Аллаh инкяр эткенлерге Нуhнынъ къадынынен Луутнынъ къадыныны мисаль берди. Бу экиси, къулларымыздан эки салих кишининъ никяхлары алтында олгъанда, оларгъа хаинлик яптылар. Къоджалары Аллаhтан кельген ич бир шейни олардан узакълаштыралмады. Оларгъа: Айды, атешке киргенлернен берабер сизде киринъ! денильди.
11 Аллаh, инангъаларгъа да Фыравуннынъ къадыныны мисаль косьтерди. О: Раббим! Манъа къатынъда, дженнетте бир эв яп; мени Фыравундан ве онынъ (фена) ишинден къорчала ве мени залымлар топлулыгъындан къуртар! деген эди.
12 Иффетини къорчалагъан, имран къызы Мерьемни де (Аллаh орьнек косьтерди). Биз онъа рухумыздан уфледик ве Раббининъ сёзьлерини ве китапларыны тасдикъ этти. О, гонюльден итаат эткенлерден эди.

(Аетлерде баас этильгенлерден Аз.Нуhнынъ къадыны къавмына онынъ меджнун олгъаныны сёйлей эди. Аз.Луутнынъ къадыны да, къоджасына кельген эркек мусафирлерни, гедже атеш якъаракъ, куньдюз де думан чыкъараракъ, хабер бере эди. Экиси де ляйыкъ олгъан джезаларына огъратылдылар.
Фыравунынъ къадыны Асие Аз.Мусагъа иман эткен эди. Бундан толайы, къоджасы Фыравун оны эллеринден ве аякъларындан дёрт къазыкъкъа багълагъан, кокюсине къоджаман бир таш къойгъан, ойледже якъыджы кунешке быракъкъан эди. Эскендже вакътында зикр этильген дуаны япар экен, рухыны теслим эткен).