Сура 89: эль-ФЕДЖР

Феджр – танъ ерининъ агъарувы ве чабакъ манасындадыр. Феджр суреси Лейль суресинден сонъ, Меккеде энген, 30 аиттир. Бу суреде эски къавмларгъа аит къыссалар хатырлатыла. Инсан огълунынъ феналыкъкъа ёнельмекте олгъаны бильдирелерек, бунынъ яман нетиджеси, дюнья аятындан сонъки аят ве о ердеки вазиетлер къыскъадан анълатыла.

Бисмиляаhирраhмаанирраhиим (Рахман ве рахим олгъан Аллаhнынъ адынен).
1-5 Феджрге, он геджеге (хаджнынъ он геджесине) чифтке, текке, (эр шейни къаранлыгъынен) орьткен анда геджеге емин этерим ки, буларда акъыл саиби ичюн эльбетте, бирер емин (дегери) бар.

(Эр куннинъ феджри, Зильхидждженинъ он геджеси, мусбет ве менфий къутуп дие билинген чифтлерден тешкиль олгъан барлыкъ алеми, буларны яраткъан ве тек олгъан Аллаh, эр шейни орьтюп, ёкъ киби эткен гедже къаранлыгъы еминге мевзу этильген, сонъра да буларнынъ еминге дегерли шейлер олгъаны къайд этильген).

6-14 Корьмединъми, Раббинъ не япты Аад къавмына; диреклери (юксек биналары) олгъан, улькелерде онъа бенъзегени яратылмагъан Ирем шеэрине, о вадийде къаяларны ёнгъан Семууд къавмына, къазыкълар (чадырлар, ордулар) саиби Фыравунгъа! Ки оларнынъ эписи улькелеринде адден аштылар. О ерлерде яманлыкъны арттырдылар. Бу себептен, Раббинъ оларнынъ усьтюне азап къамчысы ягъдырды. Чюнки, Раббинъ (эр ан) козетмектедир.

(Базы тефсирджилерге коре, Фыравун ерге дёрт къазыкъ къакътыра, эскендже этеджек кимселерни эллеринден ве аякъларындан бу къазыкъларгъа багълата, о шекильде эскендже эте экен. Шунынъ ичюн онъа «зу'ль-эвтаад – къазыкълар саиби» денильген).

15 Инсан бар я, Рабби оны имтиан этип де, икрамда булунгъанында ве бол нимет бергенинде: «Рабим манъа икрам этти», дер.
16 Оны имтиан этип, рызкъыны тарлаштыргъанында исе: «Раббим манъа эмиет бермеди», дер.
17-20 Ёкъ! Догърусы, сиз етимге икрам этмемектесинъиз, ёкъсулны тойдурмагъа бир-биринъизни тешвикъ этмемектесинъиз. Арам-элял демеден, мирасны ашамакътасынъыз. Малны адден ашыры севмектесинъиз.

(Джахилие девринде араплар мирастан къадынларгъа, балаларгъа ве етимлерге пай бермей эдилер).

21-22 Амма, ер юзю парча-парча олгъан, Раббинъ(нинъ эмри) кельген ве мелеклер саф-саф тизильген вакъытта (эр шей ортагъа чыкъаджакъ).
23 О куню джеэннем кетирилир, инсан япкъанларыны бирер-бирер хатырлар. Факъат бу хатырлавнынъ не файдасы бар!
24 (Иште, о вакъытта инсан:) «Кешке бу аятым ичюн бир шейлер япып ёлласа эдим!», дер.
25 Артыкъ о куню Аллаhнынъ этеджек азабыны кимсе эталмаз.
26 Онынъ ураджакъ бугъавыны кимсе уралмаз.
27-30 Эй, раатлыкъкъа къавушкъан инсан! Сен Ондан хошнут, О да сенден хошнут оларакъ, Раббинъе дён. (Сечкен) къулларым арасына къошул ве дженнетиме кир!