Сура 91: эш-ШЕМС

Къадир суресинден сонъ, Меккеде энген, 15 аеттир. Адыны суренинъ ильк келимеси олгъан ве «кунеш» манасындаки «шемс»тен алгъан. Бу суреде инсаннынъ яратылышында мевджут эки хусусиет анълатыла: яхшылыкъ ве яманлыкъ. Инсаннынъ яратылышында яхшы олмакъ да, яман олмакъ да къабилиет оларакъ бардыр.

Бисмиляаhирраhмаанирраhиим (Рахман ве рахим олгъан Аллаhнынъ адынен).
1-10 Кунешке ве къушлукъ вакътындаки айдынлыгъына, кунешни такъип эткенинде айгъа, оны ашкяр эткен куньдюзге, оны орьткенинде геджеге, кок юзюне ве оны бина эткенде, ерге ве оны япып тёшегенге, нефиске ве онъа бир такъым къабилиетлер берип де, яхшылыкъ ве яманлыкъларны ильхам эткенге емин этерим ки, нефсини феналыкълардан арындыргъан, къуртулышкъа иришкен, оны феналыкъларгъа комген де, зиян эткендир.
11-15 Семууд къавмы адден ашкъаны себебинден (Аллаhнынъ эльчисини) яланлады. Оларнынъ энъ бедбахты (девени соймакъ ичюн) атылгъанда, Аллаhнынъ Ресулы оларгъа: «Аллаhнынъ девесине ве онынъ сув акъкъына токъунманъ!», деди. Амма, олар оны яланладылар ве девени сойдылар. Бунынъ усьтюне, Рабблери, гунахлары себебинден, оларгъа буюк бир фелякет ёллады да, эписини эляк этти. (Аллаh бу шекильде азап этювнинъ) акъибетинден къоркъаджакъ дегиль я!

(Аллаh Семууд къавмына Салих Пейгъамберни ёллагъан эди. Ондан муджизе истедилер. Аллаh онъа пек гузель бир ыргъачы деве ёллады. Бу девенинъ отлакъларда сербест долашувы, белли бир куньде сув ичюви, девеге кимсенинъ феналыкъ япмамасы эмир этильди. Къудар б. Салиф адлы бириси Аз. Салихни яланлады. Сонъ девени сойдылар. Аллаh оларнынъ мемлекетлерини башларына йыкъты ве оларны эляк этти. Олардан къалгъан харабелер аля мевджуттыр).