Меаариджден сонъ энген, ильк меккий сурелерден олуп, 40 аеттир. «Небе'» – хабер демектир. Къыямет хаберлерини анълаткъаны ичюн, бу ад берильген.
Бисмиляаhирраhмаанирраhиим (Рахман ве рахим олгъан Аллаhнынъ адынен). | |
1. | Бир-бирилеринден нени сорайлар? |
2-3. | (Инанып-инанмамакъта) ихтиляфкъа тёшкен буюк хаберними? |
4. | Ёкъ! Анълайджакълар! |
5. | Кене ёкъ! Олар анълайджакълар! |
6-7. | Биз ер юзюни бир тёшек, дагъларны да бирер къазыкъ япмадыкъмы? |
8. | Сизни чифт-чифт яраттыкъ. |
9. | Юкъунъызны бир раатланув яптыкъ. |
10. | Геджени бир орьтю яптыкъ. |
11. | Куньдюзни де чалышып къазанув вакъты эттик. |
12. | Усьтюнъизде еди къат сагълам коклер бина эттик. |
13. | (О ерде) алев-алев янгъан бир къандиль яраттыкъ. |
14-16. | Сизге урлукълар, осюмликлер (тереклерни), бир-бирилерине битишик багълар-багъчалар етиштирмек ичюн, усьт-усьтюне топланып сыкъышкъан булутлардан шырыл-шырыл акъкъан сувлар эндирдик. |
17. | Шубесиз, укюм куню – вакъыт оларакъ тайин этильгендир. |
18. | Суургъа уфленген куню, топ-топ Аллаhкъа келирсинъиз. |
19. | Кок юзю ачылыр ве о ерде къапулар пейда олур; |
20. | Дагълар юрютилир, ылгъым алына келир. |
21-22. | Шубесиз, ёлдан азгъанларнынъ барынаджакъ (сыгъынаджакъ ери) джеэннем пусуда беклемектедир. |
23-26. | (Ёлдан азгъанлар) о ерде асырлар бою къалырлар, о ерде бир серинлик я да (сувсызлыкъ кеткизген) бир ичимлик татмазлар, анджакъ (дюньяда япкъанларына) уйгъун къаршылыкъ оларакъ, къайнакъ сув ве ирин татарлар. |
27. | Чюнки, олар джеза кунюнинъ (келеджегини) умют этмез эдилер. |
28. | Бизим аетлеримизни яланлагъандан-яланлагъан эдилер. |
29. | Биз исе, эр шейни бир китапта сайып язгъандырмыз. |
30. | Татынъ! Бундан сонъ анджакъ азабынъызны арттыраджакъмыз. |
31-34. | Шубесиз, такъва саиплери ичюн умют этильгенни тапкъан ерлери – багъчалар, юзюм багълары, кокюслери гъондже киби къабаргъан акърандаш къызлар, ички толу къаделер бардыр. |
35. | Олар о ерде не бош бир лакъырды, не де ялан эшитирлер. |
36. | Булар Раббинънинъ етерли бир ихсаны, мукяфатыдыр. |
37. | О, коклернинъ, ернинъ ве экиси арасында олгъанларнынъ Раббидир. О, рахмандыр. О куню инсанлар Онъа къаршы къонушмагъа изинли дегильдирлер. |
38. | Рух (Джебраил) ве мелеклер саф-саф олуп тургъан куню, Рахман изин бергенлеринден башкъалары лакъырды эталмазлар; лаф эткен де, догърусыны сёйлер. |
39. | Иште, о кесен-кес келеджек куньдир. О алда, истеген инсан Раббисине баргъан бир ёл тутсын. |
40. | Биз, якъын бир азаптан сизни тенбиеледик. О куню инсан эвельден япкъанларына бакъджакъ ве инкярджы кимсе: «Кешке топракъ олсам эди!» дейджек. |