Къур'ан-ы Керим ве изаатлы манасы

Сура 79: эн-НААЗИААТ

Небе' суресинден сонъ, Меккеде энген, 46 аеттир. Адыны, «сёкюп чыкъргъанлар» яхут «чекип чыкъаргъанлар» манасындаки «наазиаат» келимесинден алгъан. Эсас фикир оларакъ къыяметни анълатыр.
Дженаб-ы Аллаh суренинъ башында ильки беш аетте беян этильген кучь ве мелекелернен донаткъан варлыкъларгъа емин этмекте.
Бисмиляаhирраhмаанирраhиим (Рахман ве рахим олгъан Аллаhнынъ адынен).
1-5.  Сёкюп чыкъргъанларгъа, явашча чеккенлерге, ялдагъанлардан-ялдагъанларгъа, ярышкъандан-ярышкъанларгъа, иш тртиплегенлерге ант олсун;
6-9.  Биринджи уфлев (кяинатны) сарскъан, оны экинджи уфлевни такъип эткен куню, иште, о куню юреклер къайгъыдан титрер, козьлер ёргъун олур.
10-11.  «Ольгенден сонъ биз, (дюньядаки) ильки алымызгъа къайтарыладжакъмызмы, (эм де) чюрюген кемиклер олгъандан сонъмы?» дерлер.
12.  «О заман бу, зиянлы бир къайтув олур», дедилер.
13.  Бу дёнюш, садедже бир сесленювге бакъар.
14.  Бирден озьлерини махшерде була къоярлар.
15.  (Хабибим!) Санъа Мусанынъ хабери кельдими?
16.  Мукъаддес вадий Туваада Рабби онъа бойле сесленген:
17.  Фыравунгъа бар! Чюнки, о чокъ адден ашты.
18-19.  Де ки: Арынувны ве сени Раббимнинъ ёлуна къавуштырувымны истерсинъми? Бойледже, ондан къоркъарсынъ.
20.  Ве онъа энъ буюк муджизени косьтерди.
21.  (О исе) аман яланлады ве исьян этти.
22.  Сонъра (инкяр ичюн) бар гъайретини косьтеререк, сыртыны чевирди.
23.  Дер’ал (адамларыны) топлады ве (оларгъа) багъырды:
24.  Мен, сизинъ энъ юдже Раббинъизим! деди.
25.  Аллаh оны, (эр кеске ибрет оларакъ) дюнья ве ахирет азабынен джезаландырды.
26.  Эльбетте, бунда, коркъкъан кимселер ичюн, буюк бир ибрет бар.
27-29.  Сизни яратмакъ даа кучьми, ёкъса, кок юзюни яратмакъмы ки, оны Аллаh бина этти, оны юксельтип, низамгъа къойды. Геджесини къарартты, куньдюзини агъартты.
30-33.  Ондан сонъ да, ер къурресини тёшеди. Озюнъиз ве айванларынъыз ичюн бир файдаланув олмакъ узьре, ерден сувны ве отлагъыны чыкъарды ве дагъларны къави бир шекильде ерлештирди.
34-36.  Эр шейни алт-усть эткен о буюк фелякет кельген вакъытта, инсан япып-эткенлерини хатырлайджакъ куню ве корьгенге джеэннем ачыкъ бир шекильде косьтерильген вакъытта;
37-39.  Адден ашкъангъа ве дюнья аятыны ахиреттен усьтюн корьгенге, шубесиз, джеэннем тек барыныладжакъ (сыгъыныладжакъ) ердир.
40-41.  Раббининъ макъамындан къоркъкъан ве нефсини фена истеклерден узакълаштыргъанлар ичюн исе, шубесиз дженнет екяне сыгъыныладжакъ ердир.
42.  Сенден къыяметни сорарлар: Келип чатувы не вакъыт? (дерлер).
43.  Сен оны не ерден билип, бильдиреждексинъ?
44.  Онынъ сонъ ильми ялынъыз Раббинъе аиттир.
45.  Сен анджакъ ондан къоркъкъанларны тенбиелерсинъ.
46.  Кыямет кунюни корьгенлеринде, (дюньяда) садедже бир акъшам вакъты я да къушлукъ вакъты къадар яшагъан киби санарлар.